அரசியல் எனக்கு பிடிக்கும் - 2

அரசியல் எனக்கு பிடிக்கும் என்ற நூல் பற்றிய பார்வையின் முதல் பாகம் இந்த சுட்டியில்


சோசலிச வார்த்தையை இந்திய அரசியல்வாதிகள் எப்படி பயன்படுத்துகிறார்கள் என்பதை எம்ஜிஆர் மூலம் விளக்குகிறார், எம்.ஜி.ஆர். ஒருமுறை லண்டன் பிபிசியில் பேட்டி கொடுத்தார், அதிமுக கட்சியை ஆரம்பித்த சமயம் அது, அண்ணாயிசம் தான் எங்கள் கட்சியின் கொள்கை என்றார், அப்போது நிருபர் அண்ணாயிசம் என்றால் என்ன என்ற கேள்விக்கு "கேப்பிட்டலிசம், சோசலிசம், கம்யூனிசம் மூன்றும் சேர்ந்தது தான் அண்ணாயிசம் என்றார்", கேப்பிட்டலிசம் தனியுடமை, அதன் அழிவில்தான் சோசலிசமும் அதற்கடுத்த நிலையான கம்யூனிசமும் தோன்றமுடியும் இந்த மூன்றும் எப்படி ஒன்று சேரமுடியும் என்று விமர்சிக்கிறார் ஆசிரியர்.(எம்ஜிஆர் பற்றிய தகவல்களை அறியும் ஆர்வமுள்ள செல்வன் கவனிக்க)

பண்பாடு அல்லது கலாச்சாரம் என்ன?

கேள்வியை கேட்டு பதிலும் போடுகிறார் ஆசிரியர், மனித மனங்களை பாடம் செய்யும் வைத்தியம் தான் பண்பாடு அல்லது கலாச்சாரம், ஆளும் வர்க்கம் தன் தேவைகளுக்கு ஏற்ப மக்களின் மணங்களை பண்படுத்தும்.

சாதி என்பது இந்தியாவின் வர்க்க ஏற்பாடு மட்டுமல்ல, அது ஒரு பண்பாட்டு நிறுவனமும் தான், பிறப்பினால் ஒருவனை செருப்பு தைக்கவும் ஒருவனை பூசை செய்யவும் என மறுப்பின்றி மனரீதியாக ஒப்புக்கொள்ளும்படிக்கி பாடம் செய்கிறது சாதி, தொழிலாளி வர்க்கம் சாதிகளாக பிரித்து பார்ப்பதில் யாருக்கு இலாபம்.( நான் அறிந்த வரை சாதிப்பிரச்சினை பற்றி பேசிய ஒரே கம்யூனிஸ்ட் இவராகத்தான் இருக்கும் - சந்திப்பு கவனிக்க)

அடுத்ததாக ஆசிரியர் ஊடகத்தையும் விட்டு வைக்கவில்லை, மக்களின் மனங்களை முதலாளித்துவத்துக்கு சாதகமாக பயன்படுத்துகின்றன, மீடியா இன்று ஒரு சக்திமிக்க பண்பாட்டு நிறுவனம். எம்.ஜி.ஆரின் "ஆண்டவன் உலகத்தின் முதலாளி அவருக்கு நான் தொழிலாளி", ரஜினிகாந்த் "ஒருவன் ஒருவன் முதலாளி உலகில் மற்றவன் தொழிலாளி" விஜயகாந்த் "எங்க முதலாளி நல்ல முதலாளி" என்றது, ரொம்பப்பிரபலமான கதாநாயகர்கள் முதலாளியை கடவுள் ஸ்தானத்தில் வைத்து பாடுவது காலம் காலமாக நடக்கின்றது, இதன் மூலம் முதலாளி-தொழிலாளி என்பது ஆண்டவன் சித்தம் என்று நம்பவைக்கிறது என திரைப்பட நாயகர்களையும் ஒரு வாரு வாருகிறார்.

எந்த கல்லுரியிலாவது தொழிற்சங்கம் பற்றி ஒரு பாடம் இருக்கிறதா ? என கேள்வியெழுப்புகிறார் (நியாயமான கேள்விதான்), பள்ளிகளும் சாதிகளும் மீடியாவும் மட்டுமல்ல மதம் குடும்பம் போன்றவையும் பண்பாட்டு நிறுவனங்கள்தான் முதலாளித்துவத்துக்கு ஆதரவாக நம் மூளைகளை பண்படுத்தும் என இப்படியும் ஒரு சொருகு சொருகுகிறார் ஆசிரியர் நாம் குடும்பம் வேண்டாம், சினிமா வேண்டாமென சொல்லவில்லை, உடம்பால் தொழிலாளியாக இருக்கும் நாம் உள்ளத்தால் முதலாளிகளுக்கு ஆதரவாக இருக்குமாறு தயாரிக்கப்பட்டுள்ளோம் என்கிறார்.

பொருளாதாரப் போராட்டங்களுக்கு எவ்விதத்திலும் குறைவில்லாத அளவில் கலாச்சாரப் போராட்டத்தை தொழிலாளி வர்க்கம் நடத்தியாக வேண்டும் என்கிறார் ஆசிரியர்.

உண்மையான அரசியல் என்பது பொருளாதாரம் யார் கையில் இருக்க வேண்டும் என்பதை பற்றியது தான், அதில் இரண்டே அரசியல் தான் இருக்க முடியும், ஒன்று இடதுசாரி மற்றது வலது சாரி, பொதுவுடமை தனிவுடமையன்றி வேறு அரசியலே கிடையாது, பொதுவுடமையும் தனிவுடமையும் சேர்ந்து தான் எங்கள் கொள்கை என்று சொல்பவர்கள் தனி உடமை ஆதரவே.

புத்தகத்தின் கடைசியில் சில கேள்வி பதில்கள் உள்ளன.

எல்லா கட்சிகளுமே இடது, வலது என்று பிரித்து போட்டுவிடமுடியுமா? இடையில் எதுவும் இல்லையா?

பொதுவுடமை, தனியுடமை இரண்டுக்கும் இடையில் யாரும் நிற்கமுடியாது, அதே சமயம் தமிழ்நாட்டில் திராவிட இயக்கம் தோன்றிய கால்த்தில் அது உயர்சாதி ஆதிக்கத்துக்கு எதிராக புறாக்கணிக்கப்பட்ட ஒடுக்கப்பட்ட சாதிகளின் குரலாக பிரதேச மக்களின் நலன்கள் புறக்கணிக்கப்படுவதை எதிர்த்து ஜனநாயக இயக்கமாக பிறப்பெடுத்தது, அதன் சரித்திர முக்கியதுவத்தையும் ஜனநாயக உள்ளடகத்தையும் நாம் மறப்பதில்லை, அதற்கு உரிய மரியாதையை பாட்டாளி வர்க்கம் தரவேண்டும், ஆனால் இப்படி தோன்றும் இயக்கங்கள் காலப்போக்கில் யார் பக்கம் நிற்கின்றன என்பதை முக்கியமாக பார்க்கவேண்டும், இறுதியாக அவை வலதா இடதா என பார்க்க வேண்டும்.

அடுத்த முக்கியமான கேள்வி மேற்குவங்கத்தில் சோசலிசம் வந்துவிட்டதா?

இந்தியா ஒரு சோசலிச குடியரசு என்று பிரகடனம் செய்துவிட்டு அடுத்த வரியிலேயே தனிச்சொத்து வைத்திருப்பதை அடிப்படை உரிமை என்று பேசுகிற அரசியல் அமைப்பு சட்டத்துக்கு உட்பட்டு இயங்குவது தான் மேற்கு வங்க அரசும் என்பதை மறந்துவிடக்கூடாது, அங்கு மட்டும் சோசலிசம் கொண்டுவரமுடியாது ஆனால் அங்கே இடது சாரிகள் ஆட்சியில் இருப்பதால் ஸ்ட்ரைக் செய்யும் தொழிலாளியை அந்த அரசு அடிக்காது, டிஸ்மிஸ் செய்யாது, சிறையில் அடைக்காது, இருக்கிற சட்டங்களை வைத்து அதிகபட்சமாக பாட்டாளி வர்கத்துக்கு சேவை செய்கிற அரசாக அது இருக்கிறது, இதை அம்மாநில மக்கள் புரிந்து கொண்டதாலேயே கடந்த 30 ஆண்டுகளாக மீண்டும் மீண்டும் இடது சாரிகளுக்கே வாக்களிக்கிறார்கள்

கீழ்கண்டவைகள் நம் இணைப்பு

இந்த கேள்வியை அப்படியே தமிழகத்தில் நாற்பதாண்டுகால திராவிட கட்சிகளின் ஆட்சி என்ன செய்துவிட்டது என்றால்?

இந்திய சமூகம் சாதிய அமைப்பால் கட்டப்பட்ட ஒரு சமூகம், சட்டங்களையும் ஆழமாக ஊடுறுவியுள்ள மதத்தையும் அரசு நிர்வாகம், நீதி, ஊடகம் என அத்தனையிலும் மொத்த ஆதிக்கம் செலுத்தும் உயர்சாதியினரையும் மீறி சிறந்த முறையில் அமல்படுத்தப்படும் இடஒதுக்கீடு, சட்டப்படியான இந்தி மேலாதிக்கத்தையும் மீறிய தமிழ்மொழி உரிமை, குசராத்தில் கொத்து கொத்தாக கொலைசெய்யப்படும் சிறுபான்மையினர்(ஓரிரு சம்பவங்கள் தவிர்த்து) இங்கே நிம்மதியாக இருப்பது, மத்திய அரசில் தமிழகத்தின் வலுவான பங்கு, அதனால் வந்து சேரும் நன்மைகள், தேசியம் என்ற பெயரில் தமிழக நலன்களை பலியிடப்படுவதை ஓரளவாவது தடுக்க முடிவது என திராவிட கட்சிகளினால் நன்மைகள் பலவுண்டு, ஆனாலும் 2000ம் ஆண்டு கழிசல்களை அதே மதம், அதே தேசியம் அதே சாதி என அதே கட்டமைப்பை வைத்து கழுவுவது சற்று கடிணமானது தான்.

இதை தமிழக மக்கள் புரிந்து கொண்டதாலேயே கடந்த 40 ஆண்டுகளாக மீண்டும் மீண்டும் திராவிடகட்சிகளுக்கே வாக்களிக்கிறார்கள்

பொதுவாக சானித்தாளில் சிறிய சிறிய எழுத்துகளில் அச்சடிக்கப்பட்ட இடது சாரி புத்தகங்களுக்கிடையில் ஓரளவு கண்ணுக்கு உறுத்தாத எழுத்து அளவும், மிக எளியநடையில் பல விவரங்கள் தரும் இந்த புத்தகம் அரசு, அரசியல் பற்றிய ஒரு புரிதலை தருகின்றது, எல்லாவற்றிற்கும் மேலாக எனக்கு தெரிந்த அளவில் சாதிப்பிரச்சினை பற்றி பேசிய இடது சாரி புத்தகமும் இது.