"திராவிடம்" - தேவையா?

//You people aim to stand up for Tamizhans fine. But why the hell you chose "Dravidian" name along with that. Do you want to include people like Kannadigas? Do you know Kannadiga's opinion about Tamizhians? I don't understand why you should standup for people who themself don't say they are Dravidians.//

நமது பதிவு ஒன்றில் முரளி என்ற நண்பர் இட்ட பின்னூட்டம் இது. நம் குழு மீது ஆர்வம் காட்டி பல நண்பர்களும் இதே கேள்வியை மின்னஞ்சல் மூலமும் நேரிலும் கேட்டிருக்கிறார்கள். சமீபத்தில் பேராசிரியர் சுப.வீ. அவர்களின் நேர்காணல் ஒன்றினை வாசிக்க நேர்ந்தது. நண்பர் முரளி மற்றும் ஏராளமானோரின் சந்தேகத்தை நிவர்த்தி செய்யும் வகையில் சுப.வீ. பதிலளித்திருக்கிறார் என்று தோன்றுகிறது.

இது குறித்த விரிவான விவாதம் நண்பர்களிடையேயிருந்து வரவேற்கப்படுகிறது.

பேராசிரியர் சுப.வீ.யின் கருத்து :

பொதுவாக என்னைப் பொறுத்தவரை நான் அரசியல் தளங்களில் தமிழன் என்ற சொல்லை கூடுதலாகவும் சமூக நீதி தளங்களில் திராவிடன் என்ற சொல்லை கூடுதலாகவும் பயன்படுத்துகிறேன். திராவிடம் என்ற சொல் ஆந்திரம், கேரளம், கர்நாடகம், மக்களை உள்ளடக்கியதாக நான் கருதவில்லை. அவர்கள் யாரும் தங்களை திராவிடன் என்று அழைத்துக் கொள்ளவில்லை. திராவிடன் என்ற சொல்லே பார்ப்பனீய கருத்து நிலைக்கு எதிரான ஒரு போர்க் குணம் கொண்ட சொல்லாக இருக்கிறது. திராவிடம் தான் இந்த மண்ணில் பார்ப்பனீயத்தை எதிர்த்து இந்த நூற்றாண்டில் எழுந்த முதல் குரல் என்பது என் கருத்து.

சித்தர்களின் காலத்திலிருந்து அந்தப் பார்ப்பனீயர் எதிர்ப்பு இருக்கிறது. சங்க இலக்கியத்தைத் தேடிப் பார்த்தால் கூட இருக்கிறது. அது ஒரு இயக்கமாகக் கட்டமைத்த பெருமை பெரியாருக்கு உண்டு. வள்ளலாரிடமும் அடிகளாரிடமும் பார்ப்பன எதிர்ப்பு இருந்த போதிலும் கூட அந்த எதிர்ப்பை ஒருங்கிணைத்து கட்டமைத்த பெருமை திராவிடத்திற்கு உண்டு. அதற்கு முன்பாகவே திராவிடம் என்ற சொல் உருவாகி விட்டாலும் கால்டுவெல் காலத்திலிருந்து ஒரு பாரம்பரியமான வரலாற்று தொடர்ச்சியிருந்தாலும் பார்ப்பனீய எதிர்ப்பை கட்டமைத்த பெருமை பெரியாருக்கு உண்டு. எனவே திராவிடம் என்ற சொல் பார்ப்பனீய எதிர்ப்பு நிலைச் சொல்லாகவே பயன்படுத்த வேண்டும்.